قصة الاخوان الثلاثة

فيلق الفيافي · #1 24/07/2004, 03:01 PM

قصه وقصيدتها

--------------------------------------------------------------------------------

بداية القصه عن ارمله ام لثلاثة اولاد وساكنه في قريه ومقطوعه من شجره ولالها من القرايب أحد الا عم الاولاد في قريه ثانيه ولايعرف عن اولاد اخوه شي خصوصاً بعد موت اخوه .
الاولاد صغار ولا يفهمون من الدنيا شي بس قلوبهم خضر وهواويه كبروا الاولاد الكبير منهم قرب من سن المراهقه وشاف وحده أعجبته وتولع فيها ومات ( يقولون ان الرجل يحب بعينه والمرأه باذنها ) مات اول واحد وحزنت عليه امه ولا قدرت تحمي اخوانه من اللي وقع فيه اخوهم الاول راحت بهم امهم للخلا عطش جوع وفقر كل ذا ما يهمها اهم شي عندها انها تحمي عيالها لايشوفون بنات ويصيبهم ما صاب الاول واللي هي خايفه منه وقع .
في ليله من الليالي مر بهم عرب وشاف الولد الكبير من الاثنين الباقين بنت من رواق بيت الشعر ونشد امه وش ذا الام مسكينه ما عرفت تصرف قالت ذا ذيب قال :

الذيب ماله قذلةٍ هلهليه = ياليت لي مرقدٍ في حشا الذيب

وطق ومات .
بقى واحد من العيال اسمه راشد تفطر قلب امه ما تقدر تحمي عيالها ولا تقدر تغير فيهم شي ولا بقي لها الا ها الولد اللي توقع انه ميت ميت وبدت تدور الاماكن اللي مافيها احد واذا شافت احد حاولت تبتعد عنه لا يشوف الولد معهم احد.
سمع القصه عم العيال ويقال له ابن نقا وتأثر منها وراح يدور على ولد اخوه وامه وحصلهم واقنع الام انها ترجع معه ويبني للولد كوخ في وسط جبال وعره ما يجيها احد وفي نفس الوقت قريبه من القريه متى ما حبت امه تشوفه راحت له واتفقوا انهم ما يقولون لاحد حتى ما احد يروح للولد وتعرف قصته ويصيبه ما صاب اخوانه .
نجحت الخطه وصار عم الولد يروح له كل يوم وياخذه معه للصيد ( يتخفى العم في مكان و راشد يطرد الصيد ويحده على عمه وعمه يرميه ) استمروا على ها الوضع مده وكان العم يقول لزوجته عن اللي يصير كل يوم ويتكلم عن الولد .
الزوجه ما صدقت اللي يقوله ولا دخل في راسها قصة اللي ماتوا انهم وقالت في نفسها ليش ما اختبر القصة هل فعلا ماتوا من الحب او لا واتفقت مع بنتين وقالت لهم القصه ومكان الولد وقالت روحن له الصباح بدري قبل لا يروح له عمه وانقلوا لي وش يصير معكم وفعلا راحن له وامزحن معه واضحكن معه راحن ولا صار له شي .
عمه راح في مكانه اللي كل يوم يجلس فيه وانتظر راشد ما جاه راشد جا العصر ما جاه وراح له وحصل اللي ما كان يتوقعه لقاه كاتب وصاته وميت وكان يوصيه ما يقول لامه انه شاف بنات ومات يبيه يقول له ان ما حصله اصلاً ولا يدري وين راح ويطالبه انه ياخذ حقه من اللي قتله يقول راشد

يقـول راشـد مـن غرايـب لحونـي مثـايـلٍ قلـبـي عطـاهـن لسـانـي
أوجس عيوني مثل شوك الفنوني بين المرامش جفن نونـي كوانـي
يا طي قلبي طـي بـال الشنونـي بال الشنـون اللـي طواهـا طوانـي
ويالوع قلبـي لـوع لـدن الغصونـي لجـاه هيـف فـي لـيـال الضخـانـي
وياحـن قلـب حـن خلجـن بكونـي وياجـر قلبـي جـر غـرب السوانـي
علـى الـذي فـي حبهـم ولعونـي ابـا السـلامـه والله الـلـي رمـانـي
تحيـلـوا بــي بالـهـوا واطـرحـونـي منـهـم حبـيـب بالمحـبـه لـحـانـي
لحـان ورث فـي ضميـري طعونـي مـكـن صـوابـي والله المستعـانـي
من مـازح الخفـرات نجـل العيونـي غــر الجـبـاه مفـلـجـات الثـمـانـي
ومــن لايعـنـه ناقـضـات القـرونـي يـبـيـع روحـــه بالـفـنـا والـهـوانـي
ان مت في راس الطويل ادفنونـي حطوا براس مصودعه لـي مكانـي
متبـيـن لاهــل الـهــوا يـذكـرونـي قـالــوا لقـيـنـا بالـمـرفـع مـبـانــي
ولازم ليا جوكـم هلـي ينشدونـي قولـوا خفـا مـا واجـهـه مودمـانـي
اخــاف لــي بنياحـهـم يزعجـونـي باصواتهـم لــي بالخـفـا والبيـانـي
يابـن نـقـا لا تقـبـل الـعـذر دونــي حيثك وصيٍ وارم بي مـن رمانـي
بمصـقـل حــده يـقـص المـتـونـي شنـع صوابـه شذراتـه مـا تـدانـي
ربعك هل العليـا حمـات الضعونـي فـوق النـظـا ومعالـجـات العنـانـي
وبا أحلف لـك يـوم هـم واجهونـي غير العنا مـن شوفهـم مـا وزانـي

قرا عمه الوصيه وشاف الاثر وعرف البنات وجابهن وجاب اهل قريته وسأل البنات وهم يسمعون وقالن ان اللي وصاهن زوجته وجاب زوجته وسألها واعترفت له بكل شي وان الدافع لعملها انها ما صدقت اللي تسمعه واعدم زوجته عمل بوصية ولد اخوه