[رائعة]

هذا الجزء الثاني من مباراة طلابي


والصدمة إن المباراة كانت بين طلابي 3\1 وطلابي 4\3

أين المفر ؟؟ البحر من أمامنا والعدو من خلفنا
من أشجع ؟

وايد احترت

بنظرات تهديد وتوعد يسألون 4\3 إنت من تشجعي؟

بضحكة مرتجفة خائفة كلكم عيالي

3\1 :
أبلة ؟؟؟؟!!!!!!!!!!!!!!!!
ما تشجعينا نحن ؟؟؟؟!!!

نظرات الخيبة هدمت جدار الحفاظ على شعور الآخرين

قلت : طبعا أشجعكم
صف 4 ونحن ؟
قلت أنتوا خلاص كبار وبعدين هذيل أنا سنتين وياهم

صف 4\3 :
زين يتشوفي من يفوز
جلست أفكر : يا شماتتهم فيني لو فازوا على 3

وبدأت المباراة

وأعصابي مشدودة وأشجع

وأقول لمعلمة الرياضة :
حرام صف 3 صغار
و4 كبار هذا ظلم

أشارت على أحد طلاب صف 3 :
شايفه الصغنن ده ؟
ده عفريت هو اللي حيجيب الجول
أقول في نفسي : الحمدلله إنج مب عمانية ولاّ بيتكسح الولد
ذكرت الله عليه

الحارس موسى حراسته ولا أروع
انصدمت بلعب صف 3 روعة
وحماسهم شوي وبيهد الجبل اللي جنبنا

وأنا أصفق وأركض عالأطراف وأتابع ( ضربني جنون التشجيع جار الزمن علي )

وصف 6 و 7 بس يتفرجوا على حماسي ويضحكوا

حمد سجل هدف التسلل واضح فلم يحتسب له
والولد عاد قام يتقلب ويتفنن من الفرح لما قالوا له تسلل سكت وقال : مو يعني
والله هدف ما شفتوا الكره لما دخل ؟
قالوا له ما هدف
سكت وكظم عيظه وطالع أبله الألعاب بكره وأكمل اللعب

أنس الصغنن العفريت
يدخل من بين رجولهم ولعبه عجيب ما شاء الله
دخل هدف ...........
لم يحتسب له لأنه دخل من فوق المرمى في فراغ دخلت الكرة منه
زعل وقال ظلم


وهكذا سجل صفي 5 أهداف كلها لم تحسب له


انتهت المباراة بالتعادل السلبي
ووعدوهم بمباراة ختامية أو بلنتيات

دخلوا الصف وهم يغلوا من الغضب
الحمدلله عشت وشفت هالمفاعيص معصبين

جربوا شوي العذاب

كم مرة تحرقوا أعصابي جربوا مرة تنحرق أعصابكم
( بديت أتشمت فرصة ما تتعوض)

دخلت وإذا بي أسمع محمد وهو فوق الطاولة ( كأنه يقودهم لثورة ضد الاحتلال ) :
ظلم هذي أبلة الألعاب ظالمة
انصدمت قلت : محمد عيب ما يصير هذي معلمتك

قال بحرقة : خمسة أهداف ما يحسبهن لي ؟
خمسة آه يالقهر ( صبوعه من كثر ما فرقهن وجمعهن على الرقم 5 حسيتهم بيطيحوا )
ضحكني من قلبي

قلت له لا من حقها ما تحسبهن بخبرك ليش

وجلست أفسر لهم كيف دخل كل هدف وليش ما انحسب مع التمثيل

عشنا وشفنا رائعة اللي ما يخصها بالرياضة صايرة محلله رياضية
هدوا شوي وتقبلوا الأمر

قالوا أبلة لو فزنا ما تسووا لنا

وطبعا راحت الحصة عالمباراة والبنات نفس الأطرش فالزفة




أمس نادوني أشوف البلنتيات بس أنا كنت معصبة عليهم وما أكلمهم

وفديتهم فازوا بس ما خبروني لأنهم زعلوا وأنا كنت وايد زعلانة ( خصام المحبين )
الحصة السابعة

كان عندهم حصة دراسات
وطلعوا من الصف وجت بنت تشتكي إن ولد قطع دفترها
انحرقت أعصابي

ورحت للصف وقلت لهم ممنوع تطلعوا وعندكم معلمة غيري

وفجأة صرخ محمد : أبلة فزنا

انصدمت وصرخت فرحا : والله فديتكم ويالأبطال . كيف فزتوا ؟

الصف كله وطبعا يتحدثون وهم عالطاولات : محمد دخل الهدف

أنا : مبرووووووووووووووووك شو غيرها مباراة كم باقي لكم عالكأس؟

معلمة الاجتماعيات المصدومة التي نسيت وجودها : احم احم

أنا : آسفه بس ثالث جلسوا مؤدبين مع السلامة