بسم الله الرحمن الرحيم
سأحكي لكم عدد من القصص حصلت لي .. لكني سأحكي بأسلوب القصاصين الكبار الذين يستخدمون البدائل مكان الأسماء الحقيقة .. وحاول ان تفهم
في يوم من الأيام كان قد اصاب ابنتي الصغيرة حمى شديدة فاضطررت الى الخروج ظهراً للصيدلية .. وما كدت أخرج من المنزل وانا في عجلة من امري مفكراً بابنتي التي يغلي رأسها من شدت الحمى باحثاً عن عيادة في منتصف النهار ، وماهي الا دقيقتين أو ثلاث منذ ان خرجت من المزل فإذا بصاحب الدراجة يوقفني ، فيدور الحوار التالي :
صاحب الدراجة : ليسن وملكية
المبدع الكبير : تفضل ، بس ليش ؟؟
صاحب الدراجة : انت مو رابط حزام ، عليك مخالفه
المبدع الكبير : انزين يالطيب .. بس انا مانتبهت وبنتي وايد مريضه يعني عندي حالة مستعجلة اريد اروح الدختر ، واذا مو مصدق تعال شوفها بالسيارة .
صاحب الدراجة : لا تحاول .. مخالفة يعني مخالفة .
كتبت المخالفة ( أمراً كان مقضيا )
القصة الثانية :
دخلت لموقع الشرطة على الانترنت لأرى مخالفاتي . فأنا على وشك الذهاب للإدارة العامة للمرور لتجديد السيارة ، ذهلت مما رأيت ، مخالفات الرادار السرعه ( 230 ) ريال واغلبها في خط الباطنة اول ماركبو الرادارات وضبطوها على سرعة 130 .. وأنا اسبوعيا@ أروح مرتين او ثلاث بحكم العلاقات الاجتماعية .. وفي الليلة التالية كنت راجعاً من دبي وعندما وصلت لصحار وكانت الساعه 3 فجراً تقريباً وأنا ميت من التعب ، إذا بدورية تستوقفني ، ودار الحوار التالي :
صاحب الدورية : ليسن وملكية
المبدع الكبير : تفضل
صاحب الدورية : المركبة منتهية
المبدع الكبير : ايي من كم يوم بس بعده فترة السماح مانتهت وانا بعد باكر انشالله ناوي اجددا ، بس التأمين خلاص جددته وهذه الأوراق .
صاحب الدورية ( بنفس .. شوي وبيدوسني ) ممم ليش كنت مسرع ؟؟
المبدع الكبير : ولد الحلال وين مسرع ؟؟!! كنت امشي 130 بس
صاحب الدورية : مم .. ليش مو رابط حزام ؟؟
المبدع الكبير : لا حول ولا قوة الا بالله .. ابوي انا مو رابط حزام لاني ماخذيت بالي
صاحب الدورية : أها .. يعني صحيح مارابط ، أوكي بسويلك مخالفة - الأخ فاضي ماعنده شغل وجاي على باله يعطيني مخالفة - لحظات شوي
المبدع الكبير : أبوي ولد الحلال علي 230 ريال مخالفات يسدني
صاحب الدورية : 230 ! يعني أنا لازم احجز السيارة
المبدع الكبير : ولد الحلال لا تحجز السيارة ولا شيء ورايا درب
صاحب الدورية : اوكي .. ممم .. برحمك وبسويلك مخالفة على الليسن علشان ماتدفع 240 لما تجدد السيارة - كأني مابدفعها يعني في يوم من الأيام .
القصة الثالثة :
كنت مع اخواني مودين اهلنا عرس في ولاية صحم ، نزلناهم وقلنا نروح صحار نجلس في مقهى ، لما وصلنا بوابة صحار حصلنا زحمة سيارات مسوين 3 مسارات - مع ان الشارع مسارين فقط - ويمشون بسرعة 40 تقريباً لأن الاخوان عندهم زفة ومصكرين الشارع بالكامل ، طبعاً ورطة للي رايح خط ، المهم جا واحد مسكين عنده افالون حاول يتجاوزهم لان شكله رايح الامارات او مكان بعيد ، المهم ماخلوه ، ولمات حاول يتجاوزهم مرة ثانية لحقه وانيت وصكر عليه الشارع ونزلو شباب وايدين وقامو يضربونه ضرب ( أحد بكس وحد يصفعه وحد يشوته ) وهو مسكين مو قادر يدافع عن نفسه واحنا لو حاولنا نساعده بنغيب معاه ، اتصلت بشرطة صحار وخبرتهم بالسالفة واننا بحاجة لدورية بسرعه ولا الرجال بيموت ، قالو احنا مرسلين دورية من وقت والحين بتوصل ( طبعاً لأننا كنا متصلين قبل علشان نخبرهم يجو ينظمو الزحمة ويخلو الزفة تمشي في مسار واحد ) عموماً في هالوقت الرجال كان يضرب وبعدين راحو على سيارته وكسروله اياها ( افالون جديدة ) ، ماصدق مسكين يشرد من بين يديهم الا ركب سيارته وشرد بروحه ، عموماً نحن مشينا وراهم يمكن نسف ساعه لحد مالفت الزفة ، ومباشرة رحنا مركز شرطة صحار وكان عندي رقم البيك اب اللي نزل منه الشباب اللي ضربو الرجال ، ودخلت عند الضابط المناوب ، عرفته بنفسي ، وجلس ياخذ البلاغ ، ولما سألته عن الدورية واننا ماشفنا ولا دورية في الشارع تهرب من الرد ، المهم ان الضابط نادى واحد من الشرطة وعطاه رقم السيارة ونوعها ، تفاجأت بأن الشرطة رجع وقال ان ( الرقم غير مسجل ) !!!! معقوله ؟؟ وانا واخاوني كلنا حفظناه وشفناه بأم عيننا ، قالي ضابط الشرطة رقم تلفونك عندي واتصل فيك في الايام القليلة القادمة ، هالايام القليلة بعدها ماخلصت لان السالفة من سنه ونص تقريباً
القصة الرابعة :
أتفاجأ عندما اكون متجهاً لشمال الباطنة بأنه وعلى الرغم من كثرة الرادارات الثابته ، الاخوان ماسادنهم يزرعولك الغام راداراتية متنقلة ، ولما ناقشت احد الشباب بالشرطة قال : مستحيل ، الحين احنا مانسوي رادارات متحركة ، وقبل يومين من كتابة هذا الموضوع شفت رادارين ، هذيلا اللي شفته الله يعين بالباقي .
القصة الخامسة :
اشتريت مركبة من الامارات ( توريد ) وطبعاً ( التوريد ) معناه ان الجمرك اندفع في ميناء دبي ، مما يعني ان الشرطة مالهم حق ياخذو عني جمرك مرة ثانية بعمان ، عموماً لما جيت ادخل عمان ، جاني الشرطي طلب أوراق السيارة ، شافها ،
الشرطي : بكم اشتريت السيارة ؟
المبدع الكبير : بالمبلغ المكتوب عندك بالأوراق
الشارطي : مستحيل هذه قيمة السيارة ، قيمة السيارة أكثر بكثير من كذا
المبدع الكبير : يعني ؟؟!!!
الشرطي : يعني انا اقيم السيارة بـ ( ابو الشباب يقول ان قيمة السيارة ضعف القيمة المكتوبه بالأوراق )
المبدع الكبير : إنت تمزح ؟؟
الشرطي : يعني لازم تدفع فرق الجمرك
المبدع الكبير : ايش!!!
الشرطي يعني لازم تدفع ( وطلع حسابته وجلس يضرباخماس في اسداس وقالي المبلغ )
المبدع الكبير : اكيد انت تمزح ، أنا ماعندي هالمبلغ ، ولو عندي مابدفع لان الجمرك اندفع لميناء دبي وتبغاني ادفع مرة ثانية !!
طبعاً ماكانت الامور بتمشي لو مادخلت فلان من الناس
هذه بعض القصص الحقيقية التي حصلت لي ،
وتساؤلي هاهنا .. لماذا يعامل رجال الشرطة الناس هكذا ؟؟ وكأن الناس خدم لهم ؟؟ أين قاعدة الشرطة التي تقول ( إكسب صديقاً ) ، وهل الرادارات قللت من الحوادث ؟؟ بل انها قللت من المستوى المعيشي للناس وقللت مافي جيوبهم ، ولماذا يتعمد الكثير من رجال الشرطة سوء معاملة الناس وإذلالهم ؟؟
اسئلة كثيرة ابحث لها عن اجابة
تحياتي لكم
المبدع الكبير
