آه يا خواني تركم ضحكتوني لين شبعت أما أنا صحت سنتين أبا سيكل بس الوالد الله يرحمه ما طاع يشريلي والوالده تقول يوم بتنجح ويوم أنجح يشرولي ساعة ولا شوية لعب.
وفي وحدة م الإجازات قرر الأهل يزوروا أهلنا في بهلا وسرت معهم وهذا بعد ما تقلبت شوي ع ظهري وبطني في الشمس .... هيه يا خوتي تره ذيك اليوم ما تروم تلز ع سيارة يشلوا عليك بخيزران..... وحن عاد ما نشوف سيارة غير نموت فرحة ..... بس عشان نشوف العداد كم معطاي.
عاد يوم نشوف جي تي أبو حشة نتولف ع الجامة نصط العداد... آه يا زمان.
عموما آخر شي رضوا الأهل يشلوني بس السيرة كانت في بيكب.
كنا مشتلين بعد العشاء.... ووصلنا نزوى قبل الفجر بساعة
.... ونمنا شوية قدام جامع السلطان ف نزوى قبل البوابة الكبيرة وكان جديد بس الأسف الباب مقفول.
ويوم طلع الصبح وحن في سوق بهلا عاد ما سياكل معهم حتى الشيوبة يعروا سياكل........... حشا
وعاد أنا عيوني يمين ويسار عالسياكل.... البالون وأبو سيت والثمانية وعشرين وأنا أعد ... بس مارمت.
عاد طلعنا م السوق شارين شوية زوارة ح الأهل ورحنا معهم .... واشوف السياكل تارسة البيت ما شاء الله
... قلت وش ها النعمة هالناس منهين يجيبوا هالسياكل ذي.
عموما عاد تعرفت ع الأهل وكان عدهم ولد شوي أكبر عني وبمرة علمني السواقة وما خلينا سكة ف حلة بيمان ولا طوي غير دخلناه.... وكانت بعض المزارع نازلة تحت في حفر وعاد اللي ما عنده بريك واغيابة.
عاد أنا ذيك الأيام تقول كنه معرس طالع شهر العسل....أقصد شهر السياكل ..... ولا دخلت ف غيبوبة كلها سياكل ف سياكل.....
بعد كمين يوم عاد سرنا السوق بالسياكل ودخلنا محل الأهل ومتروس سياكل .... وبرع الدكان سياكل أشكال وأنواع.... وعاد يخوتي هالمرة أنا ما صدقت عيني.
بعدين قام أبو صديقي هاذا ويطرش ولده يودي أغراض يمين ويسار.....
أما أنا ترى عاد ما فوت الفرصة درت أركب السياكل واحد واحد وأجربهن عند المحل..... بس الأسف الزين ما يكمل كان أبو صاحبنا صاك التواير بسنسلة عن حد يسرقهن.
عموما مرت كمين يوم وقبل الروحة مرينا نسلم ع ود العم ف الدكان قبل لا نغادر بهلا.... وقام يعطينا من خيرات بهلا ف ذيك الأيام .... كل شي ينزرع معهم ... الثوم... الدنجو.... وغيره.
بس يوم شافني أتشوف السياكل وو دعهن ما هنت عليه أروح ويديني فاضية.... وعاد والله ما أختار لي سيكل.... أضن الى اليوم ما شي كماه ف بلادنا.
وعاد مارضى الوالد ويا ريال ما يريد وبيخربه والشيمة وهاذا ياهل و...... هاه ما يريد وبيودر المدرسة..... وعاد أنا الدموع تارسة العين وأناظر ود العم خايف يغلبه الوالد .... بس في الأخير تم الإفراج عن السيكل وحملوه ف البيكب
.... ومشينا وأنا ما شوف جدامي بس أعاين ذاك الشبح اللي مصفوط ف الكريل م الجامة اللي في الغمارة .
والله ما خلصني .... بس كنت أحرصهم يوقفوا عند شيشة بترول وبغتنم الفرصة وفنص الدرب بنشر علينا التاير ووقفنا وعاد ما فرحت أنا .... ويوم خلصنا مغيرينه ما طعت أركب جدام معهم... عقيت عمري ف الكريل بيا ذاك الشبح.
والبيكب يمشي وأنا موقف السيكل ع الوقافية وأسوقه ف الكريل.....
الله يخواني أيام .... والأهل ميتين ضحك يعاينوني م الجامة وأنا فعالم ثاني................ثاني.
وعاد يوم وصلنا بالسيكل العجيب البلاد.... هاذي عاد روحها قصة تبيلها يلسة ثانية..................... وآسف عالتطويل تعبتكم معاي.