[Wahiba Sands]

تصور ان واحد جي حارتنا "سلاموه" من حارتهم "عوموه" ومعاه بيزتين وقام وفتح له بقالة وما حد فينا اعترض ولكن بالعكس رحبنا بالفكرة .. وبعد فترة اشترى مخبز الحارة ومن ثم المطعم والمغسلة والخياط .. وما كملت سنة الا وهو يملك كل الدكاكين اللي في الحارة وكمين بيت كذلك .. واصبحت بيوت الحارة كلها واهلها كلهم يعتمدون عليه ويستقرضون لوازمهم من دكاكينه وحتى ان بعضهم رهنوا بيوتهم معاه .. وماهي سنتين الا قام وبنى له عمارتين في وسط الحارة اشترى ارضهم من المدينون له من اولاد الحارة برخص التراب .. وسكن فيهم بابو وراجو وكومار ورامو وكل اللي يشتغلو في دكاكينه من الهنود .. وكانوا قبل ذلك مستاجرين بيوت من اهل الحارة .. قطع رزقهم المساكين ولكنهم ما قالوا شي لطيبتهم ويمكن سذاجتهم وخوفهم.

ومع زيادة غوازيه طبق نفس الشي وبنفس الاستراتيجية في الحواري الثانية بو قريبه منا وبعدين في الولاية كلها .. ومن الدكاكين صارت له حتى وكالات السيارات والعمارات .. وكبر واستوى هامور غبه .. يخوف ولا يخاف.

ومع تشجيع الحكومة على الخصخصة اشترى شركة الكهرباء والماي وأسس له مصارف وشركات جديدة للانشاءات ورصف الطرق وحتى التنقيب عن النفط .. وعدد من الكليات والمستشفيات .. ومع واسطاته الكبيرة استجلب العمالة الرخيصة بعشرات الالاف والادارة الاسيوية وقدم لهم الحوافز ودلعهم فاخلصو له منصاعين.

وتقوم المصارف اللي يملكها الهامور بتقديم قروض سهلة وميسرة للمواطنين من الالف ريال وحتى المية الف ريال .. بس ما عليهم سوى تحويل رواتبهم ويبقوا مواظبين على السداد مدى الحياة اقساط ما تنتهي .. والا الرميس يسعهم .. ويكون القرض بو يكسر الظهر لبيت بناه الهامور لك او لسيارة باعها الهامور لك.

وتكتشف في النهاية ان كل شيء في حياتك يرجع للهامور واصبح هو المسيطر عليك والمتحكم فيك .. فقد بنى لك البيت عن طريق اقراضك المال وشيده لك عن طريق شركة مقاولته .. واشتريت الاثاث واللوازم الكهربائية من معارضه وبالاقساط .. ومن دكاكينه في الحارة تشترى الخبز والبصل والبارد والساخن .. وترسل ملابسك لمغسلته وتخيط عند خياطه وتحلق عند حلاقه وتاكل من مطاعمه .. ومع كل ذلك قلنا ما عليه .. ترى التجارة حرة والشاطر يكسب والدولة تشجع الهوامير والراسمالية وما في اليد حيلة.

وجيت انا وقلت ليش ما حسن من وضعي المعيشي واطلع من عبودية الوظيفة .. ويمكن بتوفيق من الله تعالى استوى تويجر ما تاجر مرة وحدة .. ولكن كيف ابدأ وانا مديون بكل شيء للهامور وبنوكه .. ومع مساندة البرامج الحكومية ومؤازرتهم والاستقراض من الاهل نجحت اخيرا في ان افتح لي في حارتنا " سلاموه" دكان ابيع فيه دنجو وباقل .. ورغم ان الدكان بو مستاجرنه ملك الهامور وهو بو اشتري منه كذلك الدنجو والباقل, والغاز من عنده والماي والكهربه كذلك من شركته .. الا ان نجاحي في طبخ الدنجو والباقل وسري في خلطة التوابل اللي ورثتها من جدتي الله يرحمها ازعجت اصحاب الهامور .. والغيرة من نجاحي وخوفه من ان الدنجو والباقل بو ابيعه راح ينافس المطاعم اللي يملكها .. طرش لي رامو يقترح انهم يشاركوني النص بالنص وخبرهم سر الخلطة, ولكني ما اريد ابوح بالسر فهو راسمالي وموصية عليه جدتي الله يرحمها كما يقولون. ولا انا باغي الهامور يشاركني نص ارباحي بعدما نجحت ويكفيه كل اللي ادفعه له.

ولكن ماشي الا والهامور يطلب مني الخروج من دكانه ومن الحارة باسلوب غير مباشر .. وبعد البحث في كل الحواري الاخرى .. ومع امتناع الهامور عن تزويدي بالدنجو والباقل من دكاكينه التى تحتكر الاستيراد سواء كان بصلا او سيارة او صاروخا .. قررت الهجرة للخارج وان افتتح لي هناك ودون مضايقة من اي هامور محل لبيع الدنجو والباقل .. ومن يومها صدقوني وانا متعقد من الهوامير واكره اكل الهوامير وما اطيق اشوفهم حتى .. فلا تلوموني !!؟

شنجوب يقول ..
( عدم السيطرة على الاحتكار والخصخصة سيؤدي الى تحكم بضعة أسر من الهوامير في اقتصادنا وسيفاقم من مشاكلنا .. ولعل الربح الفاحش الذي يبتغيه هؤلاء الهوامير واصرارهم على استقدام العمالة الرخيصة سيظل عائقا وسدا منيعا في سبيل تطور المستوى المعيشي لابنائنا وسيحولهم لعمالة رخيصة مستغلة ومضطهدة هي الاخرى في النهاية )