|
وفي بيت سالم ابو منصور ...حصه اليوم في بيتهم تجلس مع اخواتها..في غرفة روضه...والاحاديث بينهن غير ساره..وكلها عن بيت ابو هزاع..
روضه بقهر واضح على وجهها: الحين هاي اللي خالد ما يبي ياخذني عشانها..
حصه: خطبها من اهلها بس ردوهم قالوا ان ولد عمها خطبها..
روضه: الحين من زينها هاي ميثا والله ولا فيها شي من الجمال..
حصه: لا تحلفين يا رويض انتي من القهر تقولين جي والله انها حلوه ..
روضه: خلها تولي مالت عليها ما بقى غير هاي ياخذها خالد..على الاقل اذا ما يبيني ياخذ وحده عدله مب هاي اللي ما تسوى..
حصه: امس عمتيه ترمسه عنج..جان يعصب ويظهر من الصاله...
روضه: ما عليج انا بداويها هاي اللي مصدقه عمرها وكل شوي مطيحه ببيت عمي محمد..
حصه: لا الحين ما قامت تيي بيتنا ما دري يمكنها هي وشماني متضاربين..
روضه: برايها خلها تولي الحين الجامعه ما بقى شي عليها اربعة ايام وتبدا وبراويج الشغل العدل..
حصه: شو بتسوين..؟؟
وقبل ان ترد روضه احدهم يدق على باب غرفتها...
روضه: ادخل..
حمده: هلا حصوه انتي هني ومحد يقولي..
وتقوم حصه لتسلم على حمده..
حمده: والله تولهت عليكم موت..
حصه: البنات زعلانات وايد منج..يقولن خلاص نستنا حمدوه..
تبتسم حمده: حرام عليكم بس والله شسوي حمد مشغول اربع وعشرين ساعه مب بايدي ولا ايده والله..
روضه: لا لا حمدوه ما بتسير بيت عمي ..انا ما صدقت حد ييلس وياي بالبيت..
حمده: هيه والله فديتها رويض محد يسليني غيرها بالبيت..
حصه: ما شاء الله اشوفكن توالفتن..
حمده: ماعليج متوالفات ولو اننا اغلب الوقت قطو وفار..
حصه: زين والله ولطوف وحليلها دوم لروحها..
حمده: اقول انا بخليكن تسولفن ع راحتكن وبسير عنكن رويض تولهت عليج يا حصه..
حصه: لا تتعذرين فيني يا حمدووه قولي انج تولهتي ع ريلج..
حمده تبتسم: حرام عليج والله اصلا حمد مب هني ظهر وعقب المغرب بيرد...
وتخرج حمده تاركه حصه مع روضه ولا تدري ما يدور خلفهن....ولا تدري بماذا يفكرن..؟؟..او ما الذي يجول في خواطرهن..؟؟؟
..........................................
الحلقه الثالثه والعشرون...
اليوم هو الخميس ...وقد تأجل كل شئ واقصد بذلك خطبة ميثا لظروف ابو خليفه الصحيه...وفي بيت ابو هزاع حصه لا تزال في بيت اهلها..وحمده ذهبت لزيارة اهلها ايضاً...وفي غرفة شما يوجد خالد وحمده ...
شما: محد قاهرني غير امايه بتجتلني هي وافكارها...
خالد: خليها امايه انا اعطيها اللي تبي ومن وراها والله ما سوي شي..
حمده متعجبه: يعني ما بتاخذ روضه..
خالد بعصبيه: باخذها الله ياخذ روحي ان شاء الله ..وربي العالم اني ماخذها لغايه في نفسي ومب حباً فيها..
شما باستغراب: شو تقصد..؟؟
خالد: ما شي عقب ما اخذ رويض بقولكم كل شي...
حمده: لا حلفت عليك تقول لي الحين ما فيه صبر لين ما تاخذ رويض ..شكل السالفه مطوله...
تصمت شما مع انها لم تكن لتعرف ما في نفس خالد وما هي غايته...لكنها ادركت وبتأكيد شديد ان كل ذلك في النهايه يعود لميثا...
خالد: مب قايل شي الحين تريوا كل شي بوقته..
شما: ع راحتك ما بنغصبك على شي بس الله يصبرك ع رويض...
ينهض خالد من مكانه وقد بدا الضيق بادياً على وجهه..وربما هناك ضربه قويه لم يعطها اهتمامه في هذه الفتره الا وهي ميثا التي انقطعت رسائلها عنه نهائياً وقد سبب ذلك له القلق الشديد..ومع ذلك فقد كابر وكابر وحاول قدر الامكان ان يستطيع التغلب على هوى نفسه..ويمنع أي سبيل للعاطفه ان يتدخل بينه وبين ميثا..التي اعدها منذ عرف الحقيقه شيئاً محرماً عليه ...
بقيت شما وحمده في الغرفه بعد انصراف خالد...وغيرن مجرى الحديث..وانحرفت بهن الاحاديث الى مجرى غير خالد....
.................................
|