سبلة العرب - اين نحن من الخليج ؟؟؟

اين حقوقنا ؟؟؟؟؟؟
اين شقانا ؟؟؟؟؟؟؟
اين تعبنا ؟؟؟؟؟؟؟
اين نحن ؟؟؟؟؟؟؟

_ما نريد الا ادني شي من حقوقنا @
_ما نريد شي مما يسمى الامتيازات يكفينا ادنى شي من حقنا (( الوظيفة ))

· قالوا الراتب ضعيف ونستحق اكثر 000 قلنا ما عليه اهم شي نشتغل هذا حالة كل الشعب العماني رواتبهم متدنية بخلاف اسعار البترول الي واصله "تب" (( 60 الى 70 دولار)) محطمه الرقم القياسي .
· قالوا ماشي مدارس قريبه قلنا ما عليه حتى لو في اليمن حن راضيين .
· قالوا درجات ماليه ماشي ( تناقض مع ما قالته وزارة المالية قالت : اذا وزارة التربية طلبت 10 درجات وزارة المالية تبعثلهم 12 درجة ) قلنا ما عليه حتى لو 200 ريال)حن قانعين لين يتحسن الوضع المالي عندهم .
· قالوا شواغر ماشي الا فقط لاصحاب الواسطات قلنا ما عليه عندكم الحق الواسطة تغلب القانون ( في النهاية طلعن مئات المدارس يعانن من نقص في المعلمين )
· قالوا وظيفة المدرس في عمان من اندر الوظائف المريحة والي بيها يمكن ينتقل الفقير الى الأحسن ويحسن وضعه المادي وعشان كذا لازم نذل شوي هذا الخريج ونحسسه بقيمتها ونخليه كم سنة في البيت عاطل لانه ما يقولون ماشي بلاش قلنا ما عليه 000 في النهاية اكتشفنا وظيفة المدرس من ازفت الوظائف في السلطنة ,,, سكري وضغط والقلب والسبب التدريس وهمه 000 لانه ما اصبح هذا مدرس اصبح الكل فراش ينقل الكتب وينظف الا آخر واصبح حارس ينتظر الطالب حتى يركبوا الحافلة ومناوبة وعور راس وملفات وبحوثات 00 الخ
باختصار دفع هذا المعلم الثمن غالي مقابل 500 ريال يستلمهن آخر الشهر
والله حاله ---- ومانين علينا

* قالوا المدارس الخاصة ما تستقبل خريجي كليات التربيه العاطلين لانهم عمانين ويريدوا رواتب اكثر قلنا ما عليه عطونا مثل ما تعطوا الوافد 100 ريال تكفينا لين الله يفرجها .
· قالوا شي امتيازات للمعلم في دول الخليج بس عندكم في عمان ماشي قلنا ما عليه 000 يوم نسلم من ضرب الطلاب والاهانات يكفينا لانه كل شي ضدنا واوليهم الوزارة وقوانينها الباليه.
؟؟؟؟؟؟؟؟؟؟؟؟؟؟؟؟؟؟؟؟؟؟

يا جماعة شو هذا الذل
هذا هو العماني من يوم يطلع من بطن امه وهوووو مذلول ومظلوم .
بعيطك مقارنة بسيطة بين وضع المدرس وغيره من ابنا دول الخليج .

((مسكين العماني بنبدأ))
1- لكي يدخل كلية التربية لازم يحصل على معدل فوق الثمانينات وغيره من ابنا الخليج بهذا المعدل يدشوا كليات الطب .
2- بينا يحصل طالب كلية التربية مبلغ هائل راتب وقدره (20 الى 60 ريال ) ما يسده حج تصوير الاوراق يحصل نظيره في دول الخليج فوق 200 ريال وفي وفي جامعة قطر يتجاوز 500 ريال.
3- يتخرج الطالب العماني وياخذله دوره سنتين تسكع وهياته في الشوارع لين يوظفووه بينما يتوظف خريج دول الخليج جمب بيته مباشرة بامتيازات مغرية .
4- بعد الدوارة في الشوارع بيتعين العماني الفقير اذا كان سكنه في البريمي بيتعين في ثمريت لا شجره ولا مدره حتى خدمات ماشي لا شوارع ولا غيره ما يشوف بيته الافي السنه مرتين او ثلاث بينما في هذا الوقت خريج دول مجلس التعاون كون نفسه وتزوج وبناله بيت .
5- من يتعين هذا الفقير خلاص ماشي نقل بيظل من 3 الى 5 سنوات وهووو وهوووووو في الغربة لا شوفت اهل ولا يقدر يتزوج ولا شي خلاص حكم عليه في المنفى.

رغم هذه المعاناة كلها نقول تهون من اجل بلدنا الحبيه عمان لكن هناك موضوعين ما ينسكت عليهن والبت فيهن امر ضروري .
1- الموضوع الاول : عدم توظيف خريجي كليات التربية من داخل السلطنة تخصص تربية اسلامية الي صارلهم سنتين متلتهين في الشوارع وخريجات السلطنة تخصص مجال بعد صارلهن سنتين وثلاث سنوات في بيوتهن والله هذا الظلم بعينه اين نحن من اسعار النفط الى تجاوزت المعقول اين ايرادات النفط هل معقول الدولة تعجز عن توظيف هولاء الشباب والفتيات والله حرام صارت الشهادة الي حصلوا عليها من تعبهم عار عليهم .
هل معقول خريج او خريجة تحمل شهادة البكالوريوس يشتغل في دكان او حمالي او يشتغل في تكسي او سائق مع هندي ما عنده شهادة السادس في بيكب في بلدنا او سائق باص او حتى هذه الاشغال ما يلاقيها هذا الخريج.
ليش التعمين ما يحلا الا في الوظائف الدنيا في الزبالة والتناكر والدكاكين والوظائف العليا ما نحصل الا الجانب متربعين عليها .

2- الموضوع الثاني : بعد كل هذا الانتظار والذل لخريجات السلطنة الي منهن انتظر سنتين والي ثلاث في النهاية يوظفوهن في اماكن نائية صعب العيش فيها .
هل هذا معقول هل هذا يصدق انا نرمي بنت ما تعرف شرقها من غربها اذا كانت من صحار نوظفها في مدرسة نائية في صلالة
والله مهزلة يعني هذا شي ما يدخل الراس كيف هذه البنت بتدبر امورها كيف بتشتغل وتبدع في شغلها وهي محرومة من ادنى شي من حقوق الانسان وهو " الامان" يعني هذا المخلوق الي وزعها في هذه المدرسة ما تصور زوجته او اخته او بنته مكانها هل بيرضى بهذا الشي
كم من الخريجات المغربات اصيب بانهيارات عصبيه وكم منهن من اصيب بامراض نفسية وكم منهن اصيب بامراض بدنية وكم منهن انتهك عرضه واغتصب على ايدي عيال الحرام .
هل هذا يقبله أي مجتمع ؟ ما اعتقد حتى المجمتع اليهودي ما يقبل هذا الشي كيف ومجتمعنا المسلم الي حرم سفر المرأة بدون محرم .
والله بامانه سؤال لموظفين قسم التخطيط هل يرضوا هذا اشي لبناتهم وليش هم بناتهم في مدارس جمب بيتههم وليش لما يطلع اسم أي بنت من بناتهم في مدرسة نائيه يقلب البقعة ويحتشر ويحاول ينقلها باسرع وقت في اقرب مدرسه من بيتها ويغرب مكانها بنت واحد فقير .
طبعا هذا المصيبة ما يدخل فيها بنات الهوامير وموظفين الوزارة والكبارية الله يخلي الواسطة تلعب دور 000 والضحية بنات الإنسان الفقير المعدوم الواسطة .

ارجوا السموحة والعذر من القاري
مع تحيات : المقبالي مدرس عاطل