جافا2000 في جمهورية التشيك (تجربة حياة)
 

جافا2000 عاد إليكم من جديد
مع الإعتذار لمسلسل الكابتن ماجد

في البداية حاب أشكر جميع الأخوة والأخوات اللي سألوا عني في فترة الغياب، كانت فترة دراسة طويلة مملوئة بالضغوطات والآلام (ما كنت أحصل اسبرين :معصب: )، والحين بعد ما تخرجت من فخر عمان جامعة السلطان قابوس (صاروا ينادوني مهندس أوين) سأحاول جاهدا العودة الى سبلتي الحبيبة سبلة ترويح القلوب

---
فاصل إعلاني

تعلن مكتبة عادول الكبرى بيع مساحات وبرايات ودفاتر لطلاب المدارس للصفوف الثاني والخامس والحادي عشر فقط وذلك بمناسبة بداية العام الدراسي الجديد

عذرا على الاعلان المتأخر بس ساعة عادول متأخرة شهر!

---

خلوكم من الخرابيط اللي قبل وخلونا ندخل في لب الموضوع (ترا ما جوعان لكن كلمة لب عجبتني لو انها تذكرنا باللمبا)، كجزء من الدراسة كان لازم اسوي تدريب صناعي، وانا اخترت جمهورية التشيك عشان التدريب، لا تسألوا ليش لانه من اسرار المهنة :D

طور التجهيزات:

كنت متحمس كثير واملا الاستمارات اول باول من دون تأخير عشان ما يكون فيه عذر للرفض لين ما جات الموافقة عليّ وهاك اليوم جافا طار من الفرحة لانه بيسافر لاول مرة في حياته، ووين؟ الى التشيك، المهم كان لازم اني اعقد قمة على مستوى العائلة لمناقشة القضية وابعادها السياسة والاقتصادية، والحمد لله القمة خرجت بتوصيات كثيرة واهمها قائمة بالاشياء اللي لازم تكون في الشنطة :D
بدت عملية الشراء والتبضع والسيرات والجيات عشان اكمل هذي القائمة لحد ما اكتملت قبل يوم من السفر تقريبا ساعتها لما حاولت اشيل الشنطة كانت توزن تقريبا 28 كيلو .. بالعماني تكسر الظهر .. غير عن كذا عندي الشنطة الثانية حوالي 15 كيلو

السفر:
ركبت الطايرة .. عاد ما مكان كاني في باص فيه مكيف ومكينته مزودة، طبعا كنت حافظ دعاء السفر فبديت أقرأه واللبانة في الثم (نصايح السفر كانت شغالة) طارت الطيارة وبديت اشوف من الدريشة احاول اميز مسقط في الليل بالليتات قدرت اعرف الجامعة وبعد كذا ما عرفت شئ لين وصلنا فرانكفورت في الفجر طبعا ما نمت لاني منتزق، هناك كان لازم اغير الطيارة واركب اللي تروح للتشيك، بس كان عندي تقريبا 4 ساعات فقلت اتمشى فالمطار بشنطتي اللي وزنها 15 كيلو (ظهري راح فيها)، وانا اتمشى نسيت الجواز وتذكرة السفر في وحدة من العربات في المطار وركبت القطار اللي يوصل بين جنبات المطار، وبعد فترة انتبهت انه الجواز ما معي، ساعتها بديت اتخيل اني اطبق في المطار وما اقدر اطلع منه، قلت اروح اسأل الشرطة فقالي روح شوفه في المكان اللي نسيته فيه (حسيت بغباء)، رجعت للعربة والحمد لله حصلت الجواز في مكانه، وتابعت الرحلة الى التشيك اللي استقبلتني بمطر غزير وبرد وانا طالع من الغربي في عمان

---

فاصل إعلاني:

شركة سيارات وسفن وطائرات بوتمشي وبو تبحر وبو تطير تسلم عليكم وتقول مو اخباركم؟

---


هنا تعبت من الكتابة وباكمل الطباعة بعدين .. كما يقولوا ترقبوا الجزء الثاني

السموحة على الغبار ترا حصلت الاشتراك مالي حليان ومصدي باحاول اسوي له صيانة في الفترة القادمة

صح نسيت أخبركم هالكلام صاير في صيف 2005 يعني من الارشيف :D

يتبع...،

زين إنك بررت موقفك ولا بتغيب :معصب::عيار::معصب:

ياخي تعرف ما نبي حبيبنا الكابتن ماجد يزعل

بس لا تكون واحد من شلته :عيار:

شكرا عالمرور .. من الحين بتملوا من وجودي في السبلة :D
الجزء الثاني في قيد الطبخ ..

الله يبارك في حياتك .. الماستر سالفتها سالفة .. بس ان شاء الله بتجي (بس ما اتوقع قريب :rolleyes: )

التتمة فيها بلاوي :D

ليش أحسن؟ :rolleyes:
أدري انه وايدين يكرهوني بس ما مشكلة .. أدور حد يطبع القصة :D

دوبري دان .. ياكسي ماش؟
تتكلم تشيكي؟ ... ترتوووب
بصراحة ما مريت بـ skin hate هذيلا وين عايشين؟ .. الحمدلله ما تعرضت لأي مضايقات

ياخي الاشتراك شوي قديم واريد حد يساعدني يشيل الغبار بو فيه .. فقلت محد غير حبايبي أهل الترويح يساعدوني :عيار:

يتبعععععععععععععععععععععع ععععععععععععععععععععععععع ععع:بلابلا: :بلابلا:

ويش قالولك بلــدية نشيل الغبار :o

في ايام الجاهلية زرت أخت التشيك سلوفاكيا في مهمة دراسة ....لا تسألني ويش وداني هناك...مثل ما شايف...دمير
قصة طويلة....
تعال :p ما خبرتنا ويش سالفتك في ارض شكودا ؟!!

شكرا عالمرور والبقية قادمة قريبا .. ترقبوا

عيل انت من الجيران :D
كيف سلوفاكيا رهيبة مثل التشيك ولا غير؟ .. عاد ما دراسة اللي في هذي البلدان .. جلست 6 أشهر وما طقت عمري
سالفة أرض شكودا قادمة .. ذاكرتني بشكودا قديييييييييمة بس بعدها تمشي يسوقها دكتور في جامعة :D قديم مثلها .. ترقبوا الجزء القادم ;)

كح غباااااار

اقول شيء هدايا ؟

اقول شفت نيدفيد في التشيك ؟ :عيار:

حمدالله ع السلامه ومبروك التخرج:D

وطلعت منتزق:عيار:

أهين بالرياضي ... ياخي ادورك من زمان :D ندفيد راسلك سلام وبطاقة تهنئة .. بس البطاقة انشرخت في الدرب الى هنا :عيار:
الهدايا خلصن .. راجع فيلو احيده مآخذ هديتك :عيار:

الله يسلمك ويبارك فيك :D
لا خلاص راحت النزقة الحين :p

:عيار: هلاااااااااااااااا

انا موجود في النت او المطعم او نادي السيب :ضحك:

فيلوا اخذ الهديه !! اكيد اللحين عارضنها للبيع في سوق السبلة :D :p

ياخي كنت ادورك قدام العريمي ... احيدك تبيع دنجو مع الشلة :p
تو اقول فيلو موه يسوي اليوم في سوق السبلة ما احيد عنده فلوس :p

:عيار: فيلو اللحين مليونير :D

لا والله؟ :eek:
زين خبرتني ... باتصل فيه الحين نروح نتسحر على حسابي .. ياخي باغي اشتري سيارة :p

الجزء الثاني

وصلت مطار براغ (العاصمة التشيكية) وسط أمطار غزيرة خلصت اجراءات المطار وطلعت الى قاعة الانتظار حيث كانت طالبة من المنظمة العالمية لتبادل الطلاب تنتظرني ورافعة اسم المنظمة، ركبنا الباص (النقل العام) ونزلنا في أحد المحطات اللي فيها سكني المؤقت وطبعا استبلينا بشنطي الثقال :D المسكينة رحمتها مخلنها تساعدني في الشنط :p

بعد كذا طلعنا ورحنا وسط المدينة اوين تريد تمشيني وتوريني الامكان المهمة، ما قصرت وعزمتني على الغدا على حسابي وطلبت لي فودكا (أحد أنواع الخمور) ما كنت أعرف ويش هذا الفودكا لين شفته قدامي، قلت لها هذا ما خمر؟ ... انا ما اشرب الخمر وعيوني مفتوحة على الآخر :eek:

وبدت الاحداث تتوالى وتتابع وبدأت بقية الشلة توصل البلد حتى صرنا تقريبا 12 شخص من دول مختلفة، طبعا لاني عماني لازم ألعب كورة بس في عمان انا دمير فيها لكن هناك أخوكم صار شيخ وهداف :D (الفرد وسط العورين شيخ :p )، وياما تهنا في المدينة وما عرفنا كيف نرد السكن والحالة حالة

أهم المواقف اللي مستحيل أنساها هي لما كنت أحاول أشتري تذكرة للنقل العام، كانت على الشباك حرمة كبيرة وما تعرف تتكلم غير تشيكي وبغيت أفهمها اني باغي تذكرة لاسبوعين وعجزت بغيت حد يساعدني ما حصلت كنت وحدي والمحطة خالية، حاولت اسوي لها 15 بالاصابع ما شي فايدة .. لين في النهابة كتبت لها الرقم على ورقة وحصلت مرادي بعد ما قضيت معها حوالي ربع ساعة :p

وغيرها وغيرها من المواقف الغريبة والعجيبة اللي صارت هناك بس الحمدلله عدت على خير :D

وفي يوم الرجوع إلى عمان .. كانت رحلتي في الفجر وقررت اروح بالباصات الى المطار فكان لازم اركب آخر باص، يعني اذا راح عني راحت الطيارة :D .. وصلت المحطة وانتظرت الباص لين جا .. بس النحاسة اني ركبت الباص الغلط .. ويعني لازم ارجع في الباص المعاكس المهم نزلت في المحطة اللي بعدها (طبعا سالفة الشنط تكررت هنا بس هالمرة كنت وحدي) ورحت اركض للباص المعاكس اللي تسكر فيه الباب اول ما وصلت قدامه! .. ساعتها شفت عمان راحت عني واني راح ابقى في التشيك فترة طويلة بس ربكم ستر وانفتح الباب .. تنفست الصدعان ودخلت ورجعت عمان ;) ... وتوتة توتة خلصت الحدوتة

أدري ما حلوة :p

ما شاء الله جفجوووف هنا ! أشرقت وأنورت واستهلت وأمطرت :عيار: !

باقي من الشلة عماني وتكمل الحسبة :p .

حيا الله بمن لفانا ، نورت السبلة خينا :) .. راجع وعندك حكاوي كثيرة .. بس ما خبرتنا مدة السفرة كم ؟ وهل رجعت للوطن على طوووول والا بعدك :عيار:

وآخر شي .. تشاااااااااووووووو :p

حلوة ..:)



رحلة شيقة .:)

الحمدلله ع السـلامـه :)

لو انـه القصص مغبره :عيار: :D

بس ما فيها شي يوم الواحد يتذكر الاحـداث الغريبه اللي يمر بهن:مفتر: :D

أمطرت؟ :rolleyes: لا يكون بيتنا الوحيد اللي ما فيه مطر

أهلين أختي أمة الله .. شي جيلي؟ :rolleyes:

عماني له وحشة بس حتى فيلو ما اشوفه في الاروقة :عيار:

السفرة كانت ستة أسابيع من التشتيته .. بس كانت ايام لا تنسى ;)

شكرا عالمرور أخي .. رحلة بس للاسف ما أكلت جح هناك :معصب:

كح كح كح .. لا تنفضي الغبار فوقي :mad:

الله يسلمك .. لكن عاد ما أحداث .. أول يوم تمنيت اني ارد عمان في أول طيارة :p .. بس لا تخبري حد

عودا حميدا جافاا2000 يا مغبر

رحلة اكيد استمتعت فيها وما
راح تنساها
وانت من وين ما ترووح تنسى شنطك
وتغلط فالباص:D

حياك الله جافا:)

المتعة كانت كبيرة .. والحمدلله .. لكن هذي الشنط بهدلتني ... حتى شنطة ال 15 كيلو خلعتلي ظهري وانا راد اول ما وصلت البيت سيدة عالكرفاية اريد ابسط ظهري :p
أما الباصات .. فحدث ولا حرج :D

مثل ما يقولوا ... ديوكو .. يعني شكرا :)

جافا2000:eek: :eek:


هلاااااااااااااا بجافا وجاما وديلتااااااااااا:p :ضحك: :ضحك:

موووو حالك ومووو حال الدراسه زين عبرتا ودشيت بس:p

و دجاجو مو يعني :rolleyes:









:عيار:

واكتسبت لغة بعد هاااه
ممتاز
موفق:)

أهليييييين بالسواحيلي ... وي هوجامبو؟ :p
الحمد لله كله عال العال ... الدراسة خلصت وجاء دور العمل ;)

أفا كيف ما أعبركم :rolleyes: .. المراقبة كانت مستمرة من بعيد لبعيد ... عشان النظام :p
كيف أموركم؟ :عيار:

رووووووحي ناااااامي :o

يعني لون الجح أحمر :p

أدور عشا :rolleyes:

عاد ما لغة :D .. كان معي معجم ولما اروح مطعم تبدا عملية البحث في المعجم :p

كتابتهم حروز :D